شرح من قناص محترف لأهم وأخطر عملية قنص تمت عبر التاريخ

 

شرح كيف تكون قناص محترف و أطول مسافة قنص تمت عبر التاريخ

البداية - اساسيات عملية القنص بواسطة المحترفين

أولاً إنت عشان تبقي قناص كويس لازم تبقي شاطر جدا في علوم الفيزياء و حساب المثلثات .. في كمية معلومات بيكون القناص عارفها ملهاش علاقة خالص بتدريبه العسكري و نسبة قليلة أوي هي اللي تقدر توصفها علي إنها معلومات لازم شخص عسكرى يعلمها لك .. 

إنت مثلاً لو عايز تبقي قناص محتاج تعرف إن الطلقة عيار نص بوصة ممكن تطير لمسافة 7.5 كيلومتر .. بس إنت محتاج تكون فاهم إيه هي الحاجات اللي بتأثر علي الطلقة و هي طايرة في الجو و دي حد متخصص فيزياء و رياضيات و حساب مثلثلات هو اللي لازم يعلمهالك .. عندك الجاذبية .. عندك سرعة و إتجاه الريح .. عندك هو إنت إرتفاعك كام من علي سطح البحر؟ .. عندك هو إنت في مكان الضغط الجوي فيه كام؟ .. عندك الرطوبة .. عندك حاجة إسمها تأثير كوريليوس أو Coriolis Effect و ده يمكن أهم عامل بيؤثر علي الطلقة وهي ماشيه في الجو .. إنت عشان تقول علي نفسك قناص بتعرف تصطاد أهداف من مسافات بعيدة لازم تكون عارف كويس أوي إزاي تحسب الحاجات دي كلها و تعرف هي بتؤثر إزاي علي مسار الطلقة؟ .. في الشرح حنركز كلامنا علي 4 عوامل يمكن اعتبارهم أهم العوامل اللي تؤثى علي عملية القنص للمحترفين :

1- الجاذبية الأرضية.

2- سرعه الريح.

3- الضغط الجوي.

4- تأثير كوريليوس أو Coriolis Effect.

أولا: شرح تأثير الجاذبية الأرضية

فى البداية لازم تعرف أنه بمجرد ما بتضغط علي الزناد و الطلقة بتطلع من البندقية فهي بتطلع شايلة شوية طاقة .. و هي ماشية الطاقة دي بتفضل تقل و لما الطاقة دي بتقل قدرة الطلقة إنها تقاوم تأثير الجاذبية الأرضية هي كمان بتقل .. 

كل ما الطلقة طارت مسافة أطول و كانت ماشية بسرعة أقل كل ما قدرة الجاذبية الأرضية إنها تشدها ليها حتزيد و دي ظاهرة بتتسمي Bullet Drop أو سقوط الطلقة .. الطلقة و هي ماشية بتبدأ تقع و الكلام ده يمشي علي أي طلقة قناصة حتي الطلقة عيار نص بوصة 0.5 Caliber اللي بتضربها من بندقية قوية أوي زي McMillan TAC-50 .. كل ما المسافة اللي بتطيرها الطلقة أو الRange زاد كل ما الBullet Drop هو كمان بيزيد .. 

عشان كده و إنت في الجيش لو أخدت فرقة قناصة بيقولك نشن فوق الهدف بشوية صغيرين و العكس مع البنادق الألية عشان رد الفعل بتاع ضرب النار بيخلي البندقية تطلع لفوق بس ده ممكن نشرحه بعدين مش دلوقتي

ثانيا: شرح تأثير سرعة الرياح

لما بتيجي تصطاد هدف من علي مسافات بعيدة سرعة الريح بتكون عامل مهم أوي في حسبتك .. إنت ممكن ريح بسيطة خالص سرعتها متعديش 1.5 متر في الساعة يعني يدوبك نسمة هوا معدية تخليلك الطلقة بتاعتك تبعد عن مسارها .. 

تعالوا نضرب مثال .. لو أنا معايا بندقية قناصة و طلقة عيار نص بوصة 0.5 Caliber و بصطاد هدف علي بعد 400 متر فممكن ريح بسيطة زي ما قلتلك سرعتها متعديش 1.5 متر في الساعة تبعد الطلقة بتاعتي عن مسارها بمسافة تعدي 75 سنتيمتر .. لو أنا بقي بصطاد هدف من علي مسافه 3800 متر فريح زي دي ممكن تفسحلي الطلقة بتاعتي بعيد عن الهدف بمسافة 9 متر .. ده معناه إن الإتنين قناصة كانوا المفروض يعملوا حسابهم إن الريح حتخلي الطلقة تبعد أكتر عن الهدف بمسافة حوالي 9 متر فده كمان بيخش في الحسبة

ثالثا : شرح تأثير الضغط الجوى

الضغط الجوي هو دالة في إرتفاعك عن سطح البحر بس لو إنت قناص بتصطاد هدف علي بعد 500 متر أو أقل فإنت العوامل زي الضغط الجوي و الرطوبة و درجات الحرارة مش بتاخدها في حسابك و بتعملها Ignore .. الكلام ده مبيحصلش لما بتصطاد هدف علي مسافة كبيرة .. القناص بيبقي معاه Wind Sensor و مقياس للضغط الجوي و بيكون معاه تقرير عن حالة الجو .. اللي بيعقد الدنيا هو إنت بتضرب الطلقة الساعة كام .. إنك لو بتضرب طلقة وقت الفجر فدي بتبقي حسبة و لو إنت بتضرب نفس الطلقة علي نفس الهدف في وقت الظهر بتبقي حسبة تانية خالص .

رابعا والأهم: شرح تأثير كوريليوس coriolis effect

عامل كبير في حسبة القناصة بيعتمد علي دائرة العرض اللي إنت عندها و التأثير ده بيبان أوي كل ما الهدف بعد عنك .. لو إنت زي ما الإتنين قناصة الكنديين كانوا في العراق يعني في النص الشمالي من الكرة الأرضية فالطلقة بتاعتك لما بتطلع بتحدف يمين .. العكس لو إنت في جنوب أفريقيا مثلاً يعني في مكان جنوب خط الإستواء في النص الجنوبي من الكرة الأرضية ساعتها حتلاقي الطلقة بتاعتك بتحدف شمال .. مقدار الحدفان ده بيزيد كل ما إنت طلعت لفوق بإتجاه القطبين الشمالي و الجنوبي .. أزيدك من الشعر بيت .. لو الهدف بتاعك ناحية الشرق مع إتجاه دوران الكرة الأرضية فإنت بتلاقي الطلقة بتحدف لفوق .. لو الهدف بتاعك ناحية الغرب فالطلقة بتحدف لتحت .. ده برده له جداول و معادلات القناص بيحسبها قبل ما بيضرب طلقته.

أطول مسافة قنص تمت عبر التاريخ

صباح يوم 22 يونيو 2017 صحي الناس المهتمة بمجال القناصة علي مستوي العالم علي خبر جابلهم صدمة نفسية و هو إن فيه إتنين قناصة كنديين تبع وحدة إسمها Joint Task Force 2 و دي تبقي أعلي فئة في القوات الخاصة الكندية اللي هي حاجة كده زي الوحدة 777 أو 999 عندنا في الصاعقة المصرية ..  الإتنين قناصة دول قتلوا فرد من تنظيم داعش في العراق بطلقة ضربوها من علي مسافة 3,540 متر .. الرقم ده مش غلطة علي فكرة .. هم قتلوا فرد من داعش من علي بعد 3.5 كيلومتر .. 

الإتنين اللي هم واحد قناص و التاني إسمه Spotter أو مساعد القناص كانوا قاعدين فوق سطوح بيت و الطلقة عشان تطلع من البندقية لحد ما وصلت للهدف إحتاجت تقريباً 10 ثواني .. إستخدموا طلقة عيار نص بوصة أو 0.5 Caliber و ضربوها من بندقية قناصة إسمها McMillan TAC-50 .. سبب إني قلتلك إن اللي حصل ده جاب صدمة نفسية للناس اللي مهتمة أوي بموضوع القنص ده إن أخر رقم متسجل لأطول عملية قنص في التاريخ كان بإسم قناص بريطاني إسمه (كريج هاريسون Craig Harrison) قتل واحد من طالبان في أفغانستان سنة 2009 من مسافة 2475 متر .. الأسوأ من كده إن الWebsite بتاع الشركة اللي بتصنع بندقية القناصة McMillan TAC-50 بيقول إن أقصي مدي صحيح للبندقية هو 1800 متر بعدها إنت و شطارتك بقي يعني الإتنين قناصة الكنديين إستخدموا البندقية عشان يصطادوا هدف من علي بعد يعتبر ضعف المسافة اللي المُصنع اللي صنّع البندقية قالك عليها

الإتنين قناصة الكنديين لما جم يصطادوا الهدف بتاعهم هم جابوه من علي مسافة 3,540 متر و ده معناه إن لو القناص ضرب طلقته أفقي يعني منشنش أعلي من الهدف زي ما أي مدرب ضرب نار بيعلمك و إنت لسه طالب في الكلية الحربية فالBullet Drop لحظة ما الطلقة جت في الهدف كان حيبقي 6,705 بوصة يعني حوالي 170 متر .. 

إهدي بقي و ركز في الرقم اللي إنت لسه قاريه .. مسافة ال3.5 كيلومتر دي عشان أصطادك من عليها و أنا منشن بندقيتي أفقي يعني مش منشن فوق الهدف زي ما بيتقالي في مدرسة القناصة فلازم أكون واقف فوق ناطحة سحاب عشان الطلقة و هي ماشية بتقع

الناتج النهائي بتاع الحسبة اللي عملها الإتنين قناصين دول هي إن الطلقة لحظة ما جت في الهدف كانت بتطير بسرعه 282 متر في الثانية و دي سرعة تعتبر أسرع من سرعه الطيارة المدنية الجامبو اللي هي بوينج Boeing 747 و دي سرعة أقل من سرعة الصوت و الطلقة و هي ماشيه كانت بتقع 50 سنتيمتر كل ما تمشي 30 سنتيمتر .. تاني الناتج ده لحظة إصابة الطلقة للهدف مش و هي طايرة في الجو .. أنا عارف إن فيه ناس مخها قريب يسيح .. 

معني الحسبة دي إن لازم الإتنين قناصة يكونوا قاعدين فوق سطح مبني أو أي مكان تاني عالي .. بعد كده عن طريق العدسة بتاعه البندقية بتبدأ تعوض الBullet Drop بإنك تنشن البندقية لفوق الهدف .. بحسبة تانية برده .. الطلقة إحتاجت حوالي 7 ثواني عشان تطلع من البندقية لحد ما تصيب الهدف و لحظة ما جت في الهدف سرعتها كانت 282 متر في الثانية و ده معناه إن الطلقة دي بعد ما طارت أكثر من 3.4 كيلومتر كانت القوة اللي ضربت بيها الهدف كانت زيها زي ما أكون واقف قدامك بأقل من متر و تضربني بطلقة من بندقية كلاشينكوف AK-47.

في الأخر عايز أقولك إن الإتنين قناصة الكنديين دول عملوا حاجة مش كتير في العالم بيعرفوا يعملوها .. الإتنين حسبوا حسبة فيها كمية متغيرات لو كانوا غلطوا في رقم واحد كانت الطلقة باظت .. دور الSpotter إنه هو اللي بيحسب الحسبة و هو اللي بيقول للقناص ينشن فين و إزاي و إيه هي المسافة اللي ينشن فيها بعيد عن الهدف و هو بيستخدم المنظار عشان يعوض تاثير العوامل الكتير اللي إتكلمنا عنها.