كيف احقق الامان الوظيفى ؟؟

عملت لصالح مؤسسة كبري لمدة 20 سنة ، ولما جاء وقت إعادة هيكلة وتنظيم فريق العمل، تخلوا عني وفصلونى من الشغل!!

عمري ما توقعت أبدا إني أخسر شغلي، الموضوع ده سبب لي أزمة كبيرة فعلا، قعدت من غير شغل حوالي 6 شهور، بعدها بدأت شغل جديد استمريت فيه سنتين، لكن الشركة كانت خاصة، فلما صاحبها كبر في السن وساب الشركة لابنه، قام باع الشركة، وبقيت عاطل عن العمل ورجعت من تاني أدور على شغل.

مشكلتي الأساسية إني عايز شغل مستقر، إزاي اجد شغل فيه نسبة عالية من "الأمان الوظيفي"؟

الرد: 
لو كان الموضوع بإيدي كنت هرشحك لشغل مضمون إنك تفضل فيه لمدة 25 أو 30 سنة  ، بس للأسف لا وجود للشغل ده .

 انا عشت تجربة صعبة تعلمت منها إن شغل الحكومة المضمون - حسب تفكيرنا التقليدي- ليس مضمون، ولا يوجد فارق كتير عن الشغل الخاص .

بالإضافة لأن قبول شغل معين اعتمادا على اعتقادنا إن فيه نسبة أمان كبيرة، ده قرار خطير جدا ، لأنه غالبا الوظايف اللي بنربطها بمستوى "أمان وظيفي" عالي ، بتكون أقل الوظائف فائدة في تأهيلنا للتعامل مع الواقع الجديد في سوق العمل ، الواقع إلي بقول: كلنا دلوقتي عبارة عن رواد أعمال.

خليني أقول لك على سر تحقيق "الأمان الوظيفي" في 2018 : 

نحن اللي بنبني الأمان الخاص بينا ، وبنتحرك به خلال مسيرتنا المهنية ، لا يوجد صاحب شغل ممكن يضمن لك وظيفة مدى الحياة ، سواء كان شغل حكومة أو قطاع خاص .

عشان كده الأولوية بالنسبة لك دلوقتي لازم تكون إننا نخلي عندنا مزايا ومؤهلات تجعلنا " قابلين للتوظيف " بسهولة اكثر ، يعني ضاع منا شغل ، بسهولة نجد شغل تاني .. 

إزاي ده هيحصل؟ هيحصل عشان هنكون فاهمين السوق جيدا ، وايضا الناس المؤثرة في السوق هتكون تعرفنا .

عشرة نصائح هامة لكى تحقق لنفسك الامان الوظيفى الحقيقيى :-

1- لا تفكر في نفسك على إنك سلعة مكونة من شهادات وسنين خبرة ، حاول تكون شخص محترف في مجاله - إنك تتعرف على ( مشكلة مطلوب علاجها \ عمل متخصص ) بسوق العمل - تعرف عنه جيدا وادرسه جيدا واحصل على بعض الكورسات المتخصصة جدا به .

2- تابع السوق جيدا -  عشان تفهم إزاي المهنة بتتطور وبتتغير مع الوقت .

3- اعرف قيمتك الحقيقية ، خطأ الطريقة اللي بنعملها لما نتقدم لعمل جديد ونقول آخر مرتب كان كذا، المفروض إننا في أي فرصة عمل جديدة لا نتكلم عن دخلنا القديم ، الصح إننا نعرض إمكانياتنا ومهاراتنا، ونوضح قدرتنا على التعامل مع المشكلات والتحديات في الشغل، ونوضح هنفيد الشغل الجديد ده في إيه، وهذا ما سيحدد راتبك الجديد .

4-راقب باستمرار السوق ، وشوف متى ممكن يظهر احتياج للمجال اللي بتشتغل فيه ، اعمل ده حتى لو عندك شغل دلوقتي وسعيد فيه، عشان تقدر تتصرف بسرعة في أي لحظة تبقي فيها عاطل عن العمل .

5- طور مهاراتك باستمرار عشان تواكب احتياجات السوق ، سواء كان عملك بيدعمك في ده أو لأ ، لازم دائما تتطور وتتعلم الجديد في مجالك .

6- أسس شبكة علاقات كبيرة على المستوى المهني والشخصي كمان ، وحافظ باستمرار على التواصل معاهم .

7- اتقن مهارة أو حاجة في عملك متخصص جدا فى مجالك ، لازم تكون متميز قوي في حاجة محددة ، مهما كنت جيد في حاجات اخرى .

8- بعد ما تحقق كل النقاط السابقة ، ومع سنوات عملك الطويلة ، هتبقي عرفت قيمتك الحقيقية في السوق ، وهتكون وضعت يدك على مشكلة أساسية في السوق وبدأت تفكر في حلول لها، يعني تقدر تعتبر نفسك "استشاري" في مجالك ، سواء كان بدوام جزئي أو كامل ، سواء في الوقت إلي بتدور فيه على عمل أو بشكل عام.
مهم جدا تعرض نفسك في أي وظيفة بلقب استشاري ، أفضل من باحث عن عمل.

9- مع نمو مهاراتك هتبقي معروف في السوق وهيتم طلبك في مهام متفرقة ، تدريجيا هتوسع دائرة علاقاتك الشخصية بالمجتمع ، لن تشعر بالقلق لو فضلت كام شهر من غير عمل ، لأن المهام المتفرقة مع خبرتك الكبيرة هتوفر لك فلوس .

10- في النهاية هتوصل لنقطة ( هل أنا محتاج اعمل هذا الشهر ولا لأ ) ، وهي دى حالة السكينة المطلوبة وهو ما نسعى في الأساس للأمان الوظيفي عشان نوصلها .

انسى قصة الأمان الوظيفي، وابني بنفسك نوع الأمان اللي لا احد ممكن يأخذه منك.

أتمنى لكم جميعا كل الخير والتوفيق