تجربة شاب فى الهجرة الغير شرعية الى اوروبا

تجربة شاب فى الهجرة الغير شرعية الى اوروبا ..

انا سافرت ايطاليا هجره غير شرعية عن طريق اسكندريه 

التجربة بدأت بان الوضع كل يوم فى مصر بيخنقنى كل يوم عن اللي قبله واللي ابدأ ابحث عن طريقه اخرج بيها من البلد
بعد ما تعرفت على شخص قدر يوصلني بمهرب فى البحيرة "رشيد تحديدا " سوف أختصر لكم وهنتكلم من اول ما ركبت المركب كان فى فجر يوم 5/7/2016 رغم انى وصلت رشيد وقعدت فيها ٢٢ يوم مابين رشيد و ادكو وبرج العرب و العجمي و اماكن تانيه كتير عمري ما سمعت عنها فى حياتي .

اكتر من ١٥٠ شخص نازلين نركب مركب زوديك صغيره تتسع ١٠ افراد بتحولنا على دفعات لمركب تانيه طولها ١٥ متر على بعد حوالى ٥ كيلو 

مشيت بينا حوالى كام يوم فى البحر لحد وصلنا لمركب تانيه حوالى ٢٤ متر بعد حدود ليبيا عليها اكثر من ٢١٠ شخص غير ١٥٠ يعنى اجمالي ٣٦٥ فرد ٢ سوريين و حوالى ٥٠ مصر و تقريبا ٥٠ سوداني والباقي افارقه من جنسيات مختلفه وطبعا مش عايزين احكى لكم عن تجربة نقل ١٥٠ شخص من مركب لمركب فى نص البحر وامواج بترفع مركب عن تانيه اكتر من ٦ متر وعند ما يقربوا من بعض بيكون فى شخصين على طرف المركب ورا مسكينك بيحدفوك فى المركب التانيه زي ما بيحدفوا شنطة طماطم و اللي ينزل ع رجله تنكسر واللي ينزل ع كتفه يتخلع

المهم ربنا سترها الحمد لله ومفيش اي حد وقع فى المياه 

اتنقلنا كلنا فى المركب التانيه واللى كملت الرحله وهى عليها ٣٦٥ شخص بينهم حوالى ٧ اطفال رضع مركب عليها برمليين مياه البرميل ميكملش ١٠٠ لتر مع طقم سواقين مركب اشبه بالمافيا و ٣شوال عيش معفن مخزن من ٥ ايام ع كام كارتونه جبنه بتاكل مرتين فى اليوم مره الصبح بدري اوى ومره اخر النهار وكذلك بتشرب ربع كوباية ميه مره الصبح ومره اخر النهار تحت تهديد السنج و السلاح واللي طبعا غير اتحكى لنا ان المركب هتبقى عليها ميه واكل وبالكثير ٦ ايام وهتوصل للصليب او السفن اللي هتيجى تخدك بعد ما تطلب استغاثه وانا واحد من الناس سافرت بالهدوم اللي عليا مع مبلغ بسيط خالص باليورو وشوية اكل بسيط و شوية عصير جاف

اصعب ما فى التجربه ان الميه خلصت بعد ١٣ او ١٤ يوم ومش فاضل غير حاجه بسيطه بتشرب تقريبا غطا ازازه و اخر ٣ ايام من غير ميه خالص والاكل بتخاف تاكله يعطشك اكتر مش احكيلكم عن شكل الناس ومنظر شفايفهم اللى اسودت و قربت تعفن من جفاف بؤهم وماتكلمنيش عن مية البحر اللي تقريبا درجة ملوحتها اقرب بانك تدوب كيسين ملح فى ربع كوباية ميه واقسم بالله ما ببالغ لما بصور لكم درجة الملوحة انا واحد من ناس حطيت اكتى من كيلو عجوه فى قعر ازازة ميه فى سبيل انها تخفف الملوحة عشان اقدر اشربها وعند ما حطتها ع لساني رجعتها تاني بتحس ان لسانك بيتشوى وبتعطش اكتر اللى وصل الناس ع المركب انهم يبيعوا السيجارة ع المركب ب٥٠ يورو وشوية سكر حجم ٤ معالق ب ١٠٠ يورو

٣٦٥ شخص مات منهم ٥ بعد واكتر من ٣ جالهم صرع وناس دخلت فى غيبوبه ده كله بعد ما الماتور اتطل بعد ١١ يوم فى وسط بحر الحر فيه بالنهار زى ماتكون جوه بركان وليله اشبه بقطب شمالى مع هدوم مبلوله ومتغرقه ميه من الموج اللى بيضرب المركب من كل ناحيه

كلمنا الاستغاثه من تليفون ثريا بعد يوم من تعطل المركب فى مكان GPS المركب يقرأ اصلا احداثيات غلط ده قبل ما العيال طقم المركب يرمى التليفون وال GPS فى الميه بعد المكالمة واللي بعدها انتظرنا ٣ ايام ع ما وصلت لنا سفينة نرويجيه فى نص ليل اليوم الرابع واللي فضلنا عليها يومين لحد ما وصلنا ميناء messina فى جزيرة سيسليا 

....... كل اللي حكيته لكم دلوقتى بدون مبالغه ----- 5 % ---- من اجمالي التجربة وللاسف وثقت اغلبها بموبايل باكثر من ٣٥ فيلم قصير واكتر من ١٠٠ صوره وده اللي خلى السلطات الايطالية تاخذه منى .